Thursday , 19 October 2017
Headlines
മരണവീട്ടില്‍ വാക്കുതര്‍ക്കം; കുത്തേറ്റ ബന്ധു മരിച്ചു

മരണവീട്ടില്‍ വാക്കുതര്‍ക്കം; കുത്തേറ്റ ബന്ധു മരിച്ചു

കൊടകര: പേരാമ്പ്രക്ക് സമീപം തേശേരിയില്‍ മരണവീട്ടിലുണ്ടായ വാക്കുതര്‍ക്കത്തെതുടര്‍ന്ന് കുത്തേറ്റ സഹോദരി ഭര്‍ത്താവ് മരിച്ചു. കൊടകര മരത്തോംപിള്ളി ചെമ്പാട്ട് വീട്ടില്‍ ചാത്തന്റെ മകന്‍ രാജന്‍ (49) ആണ് ഭാര്യാ സഹോദരന്റെ കുത്തേറ്റ് മരിച്ചത്. എണാഞ്ചേരി ഗോപാലകൃഷ്ണനെ (47) കൊടകര സി.ഐ. കെ. സുമേഷും സംഘവും അറസ്റ്റുചെയ്തു. ഗോപാലകൃഷ്ണന്റെ അമ്മയും രാജന്റെ ഭാര്യാമാതാവുമായ ഏണാഞ്ചേരി കുട്ടപ്പന്റെ ഭാര്യ അമ്മിണി (69) മരത്തോംപിള്ളിയിലെ രാജന്റെ വീട്ടിലാണ് താമസിച്ചിരുന്നത്. അര്‍ബുദബാധിച്ചതിനെ തുടര്‍ന്ന് അമ്മ മാസങ്ങളായി ചികിത്സയിലുമായിരുന്നു. മരിച്ചതിനെ തുടര്‍ന്ന് ശവസംസ്‌കാരത്തിനായി തേശേരിയിലുള്ള ഗോപാലകൃഷ്ണന്റെ വീട്ടില്‍ വൈകീട്ട് ആറുമണിയോടെ ബോഡി കൊണ്ടുചെന്നു. പിറ്റേദിവസം രാവിലെ സംസ്‌കാര കര്‍മ്മങ്ങള്‍ക്കുള്ള തയ്യാറെടുപ്പിലായിരുന്നു. ഇതിനിടെ രാത്രി 11 മണിയോടെ ഗോപാലകൃഷന്‍ സഹോദരിമാരെപ്പറ്റിയും അവരുടെ ഭര്‍ത്താക്കന്‍മാരെ പറ്റിയും മോശമായി സംസാരിച്ചു. അത് പാടില്ലെന്ന് പറഞ്ഞ് രാജന്‍ ഗോപാലകൃഷ്ണനെ പുറത്തേക്ക് പിടിച്ചുകൊണ്ടുപോയി. ഇതിനിടെ ഇവര്‍ തമ്മില്‍ അടിപിടിയുമുണ്ടായി. ഇതില്‍ പ്രകോപിതനായ ഗോപാലകൃഷ്ണന്‍ വീടിനകത്തുണ്ടായിരുന്ന കത്തിയെടുത്ത് രാജനെ നെഞ്ചില്‍ കുത്തിഎന്നാണ് കേസ്. ഗുരുതരമായി പരുക്കേറ്റ രാജന്‍ ആശുപത്രിയിലേക്ക് കൊണ്ടുപോകുന്ന വഴിയാണ് മരിച്ചത്. അപ്പോളൊ ടയേഴ്‌സ് ജോലിക്കാരനായ പ്രതി വീട്ടില്‍ ഒറ്റക്കാണ് താമസിച്ചിരുന്നത്. മരിച്ച രാജന്‍ സിഐടിയു തൊഴിലാളിയാണ്. ഭാര്യ: സുജാത. മക്കള്‍: ഹൃദിക്, ഹൃദോഷ്, ഹൃദുല്‍.

ദു:ഖം മനസിലൊതുക്കി മകന്‍ പരീക്ഷയെഴുതി

കൊടകര: അച്ഛന്റെ അപ്രതീക്ഷിത വിയോഗത്തില്‍ ദുഃഖം മനസിലൊതുക്കി മകന്‍ ഹൃദോഷ് എസ്എസ്എല്‍സി പരീക്ഷയെഴുതി. ഭാര്യാസഹോദന്റെ കുത്തേറ്റുമരിച്ച കൊടകര മരത്തോംപിള്ളി ചെമ്പാട്ട് വീട്ടില്‍ രാജന്റെ രണ്ടാമത്തെ മകനായ ഹൃദോഷ് കൊടകര ഗവ. ബോയ്‌സ് ഹൈസ്‌കൂളിലെ പത്താംക്ലാസ് വിദ്യാര്‍ഥിയാണ്. രാവിലെ വീട്ടിലെത്തിയ അധ്യാപികമാര്‍ ഹൃദോഷിനെ പരീക്ഷ എഴുതിക്കാനായി സ്‌കൂളിലേക്ക് കൊണ്ടുപോയി. പരീക്ഷ എഴുതിയ ശേഷമാണ് ഹൃദോഷിനെ വീട്ടിലേക്ക് തിരിച്ചെത്തിച്ചത്. തുടര്‍ന്ന് നാലുമണിയോടെ നടത്തിയ സംസ്‌കാരചടങ്ങില്‍ പങ്കെടുത്തു. മൂത്തമകന്‍ ഹൃദിക് പ്ലസ് വണ്‍ വിദ്യാര്‍ഥിയാണ്.

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>